இயக்குனர் ஸ்ரீதரும் மக்கள் திலகம் எம் ஜி ஆரும்

சிவாஜியை வைத்து சிவந்த மண் மற்றும் ஊட்டி வரை உறவு என்று இரண்டு படங்களை தந்த ஸ்ரீதர் அவர்கள், மக்கள் திலகம் எம் ஜி ஆரை வைத்து எடுத்த முதல் படம்தான் "உரிமைக்குரல்". இந்த படம் ஆரம்பிப்பதற்கு முன் ஸ்ரீதர் அவர்களின் "சித்ராலயா" நிறுவனம் கடன் சுமையில் சிக்கி இருந்ததாம் . இதை அடைக்க எம் ஜி ஆரை வைத்து ஒரு படம் எடுத்தால் மட்டுமே இதிலிருந்து மீள முடியும் என்று முடிவெடுத்து எம் ஜி ஆரை அணுகினார். மக்கள் திலகம் எம் ஜி ஆரும் உடனே ஒப்புகொண்டு "உரிமைக்குரல்" படத்தில் நடித்து கொடுத்தார்.

அன்றைய சூப்பர் ஸ்டாராக விளங்கிய எம் ஜி ஆர், நடித்த படங்களில் எல்லா அம்சமும் இருக்க வேண்டும். இன்றைய மசாலா படங்கள் போல , அம்மா செண்டிமெண்ட், மரத்தை சுற்றி ரெண்டு காதல் பாடல் , ஒரு கதாநாயக துதி பாடல்,  நல்லதாக ரெண்டு சண்டைகாட்சி என எல்லாமும் இருக்க வேண்டும். ஆனால் அதுவரை ஸ்ரீதர்  நிறைய கதைக்கு  முக்கியத்துவம்  உள்ள படங்களாக எடுத்து வந்தார். இதையே ஒரு சவாலாக எடுத்துகொண்டு அவர் எழுதி இயக்கிய படம்தான் "உரிமைக்குரல்" . 

படத்தின் கதை என்று பாரத்தால், அண்ணன் தம்பிக்குள் நடக்கும் பாசப்போராட்டம் அதை தொடர்ந்து மக்களுக்கு தொல்லை கொடுக்கும் நம்பியாரை பழிவாங்குவது, இடையில் கொஞ்சம் லதாவோடு மோதல் பிறகு காதல் பின் சுபம். தன வழக்கமான முக்கோண காதல் கதையில் இருந்து வெளியே வந்து ஏறக்குறைய ஒரு மசாலா படத்தை கொடுத்தார் ஸ்ரீதர். 

மக்கள் திலகம்  எம் ஜி ஆருக்கு இது போன்ற பத்திரங்களில் நடிப்பது கை வந்த கலைதானே. அதிலும் இந்த படத்தில் அவர் உடைகளில் சிறு மாற்றம் செய்யப்பட்டிருந்தது. வழக்கமான வேட்டிக்கு பதிலாக சுருள் வைத்த வெட்டி மற்றும் ஒற்றை குதிரை பூட்டிய  ரேக்ளா வண்டி என அமர்க்களம்.

படத்திற்கு இசை MS. விஸ்வநாதன் அவர்கள் அமைத்திருந்தார். "ஆம்பளைங்களா" மற்றும் "விழியே கதை" பாடல்களை கவிஞர் கண்ணதாசனும், "மாட்டிகிட்டாரடி" , "பொண்ணா பொறந்த", "ஒரு தாய் வயிற்றில் பிறந்த" பாடல்களை கவிஞர் வாலியும்எழுதி இருந்தனர்.
இன்னும் நிறைய விஷயங்களோடு அடுத்த பதிவில் சந்திக்கிறேன்.

அன்புடன்
அசோக் குமார் 

வெண்ணிற ஆடை படமும்-இயக்குனர் ஸ்ரீதரும்

ஸ்ரீதர் அவர்கள் தமிழ் சினிமாவிற்கு புகுத்திய புதுமைகள் எண்ணிலடங்காது. அந்த வகையில் சுமைதாங்கி படத்திற்கு பிறகு ஸ்ரீதர் முற்றிலும் புதுமுகங்களை வைத்தே எடுத்த படம்தான் "வெண்ணிற ஆடை". இந்த படம் மூலம் தான் தமிழ் சினிமாவிற்கு மறக்க முடியாத நான்கு நட்சத்திரங்களை தந்தார் ஸ்ரீதர்.

  ஜெயலிலதா, ஸ்ரீகாந்த், நிர்மலா, மூர்த்தி என நான்கு பெரும் பின்னாளில் புகழடைந்தது நான் சொல்லி தெரிய வேண்டியதில்லை. இதற்கும் ஒரு படை மேலே போய் நிர்மலா  அவர்களும் மூர்த்தியும் பின்னாளில் வெண்ணிற ஆடையை அவர்களின் பெயருக்கு முன்னால்  சேர்த்துக்கொண்டு "வெண்ணிற ஆடை" மூர்த்தி , மற்றும்  "வெண்ணிற ஆடை" நிர்மலா என அறியப்பட்டனர். அதுவுமில்லாமல், அந்த வருடத்தில் ஸ்ரீதர் அவர்களுக்கு ஒரு பெரிய வெற்றிப்படமாக ஓடி பாராட்டையும் பெற்று தந்தது.

கதை என்னன்னு பார்த்தால், ஸ்ரீதரின் வழக்கமான முக்கோண காதல் கதை தான். மனநல மருத்துவரான ஸ்ரீகாந்த், மன நலம் பாதிக்கப்பட்ட ஜெயலலிதாவை  குணப்படுத்த வருகிறார். ஸ்ரீகாந்திற்கும்
 வெண்ணிற ஆடை நிர்மலாவிற்கும் காதல். இந்த நிலையில் குணமடைந்த ஜெயலலிதாவிற்கு ஸ்ரீகாந்த் மேல் காதல். ஜெயலலிதாவின் தந்தை ஸ்ரீகாந்தை வற்புறுத்த முடிவு என்ன என்பது தான் "வெண்ணிற ஆடை" படத்தின் கதை.

முதல் படத்திலே ஜெயலலிதாவிற்கு நடிப்பதற்கு நல்ல வாய்ப்பு. ஸ்ரீகாந்தின் காதபாதிரம் ரொம்பவே எதார்த்தமாகவும், இரண்டு பெண்களின் காதலுக்கு நடுவில் சிக்கிக்கொண்டு தவிக்கும் எதார்த்த மனிதராக முதல் படத்திலேயே நடிப்பில் கலக்கி இருந்தார் ஸ்ரீகாந்த். வெண்ணிற ஆடை நிர்மலா இந்த படத்தில் நடிக்கும்போது ரொம்பவே இளைய வயது. ஆகா ஒரு இளமை பட்டாளத்தையே இந்த படத்தில் இறக்கி இருந்தார் ஸ்ரீதர்.

படத்தின் இசையை M.S. விஸ்வநாதன் கவனிக்க வழக்கம் போல் பிரமாத படுத்தி இருந்தார். "அம்மாமா காற்று வந்து", "ஒருவன் காதலன்', என்ன என்ன பார்வைகளோ " , "சித்திரமே  சொல்லடி", மற்றும் "கண்ணன் என்னும் பேரை" என்று னைத்து பாடல்களை பிரமாதப்படுத்தி இருந்தார் விஸ்வநாதன்.

இன்னமும் ஸ்ரீதர் அவர்களின் பெருமைகளைப்பற்றி சொல்லிக்கொண்டே போகலாம்.

 அன்புடன் 

அசோக் குமார்

2011 தமிழ் சினிமாவில் சிறந்த பத்து பாடல்கள்

 ஒரு வருடம் முடிந்தவுடன் அந்த வருடத்தின் சிறந்த பத்து நிகழ்வுகளை திரும்பி பார்ப்பது சகஜமான ஒன்று என்பதால் நானும் எனக்கு பிடித்தபாடல்களை தொகுத்து இருக்கிறேன். நிறைய பாடல்கள்  மனதிற்கு  பிடித்திருந்தாலும் பத்து பாடல்களே என்பதால் அவைகளை இந்த லிஸ்டில் வர இயவில்லை. என்ன சொல்லபோற-வேங்கை, கண்ணாடி நீ -மங்காத்தா , ராசாத்தி போல- அவன் இவன், என்னமோ என்னமோ பண்ணுது-தேநீர்  விடுதி, நான் சொன்னதும் மழை -மயக்கம் என்ன என நிறைய பாடல்களை இணைக்க முடியவில்லை. எனக்கு பிடித்த இந்த பாடல்கள் உங்களுக்கும் பிடிக்கும் என்றே நினைக்கிறேன் !!!

படம் : அழகர்சாமியின் குதிரை.

பாட்டு : பூவைக்கேளு  காத்தை கேளு

இளையராஜாவின் மெலடி பிடிக்காதவர்கள் இருப்பது அரிது அந்த வகையில் இந்த பாடல் அவரின் மெலடி லிஸ்டில் சேரும்.

படம் : ஆடுகளம்

பாடல்:  யாத்தே யாத்தே

2011-ம் வருடம் GV. பிரகாஷ் காட்டில் அடை மழை.... இல்லை இல்லை பேய்  மழை. ஆடுகளம், தெய்வத்திருமகள், மயக்கம் என்ன என எல்லா படங்களிலும் இவர் இசை பெரிதும் பேசப்பட்டது.

படம்: எங்கேயும் எப்போதும் 

பாடல்கள்: சொட்ட சொட்ட /உன் பேரை தெரியாது

புது இசையமைப்பாளர் சத்யா, முதல் படமே நல்ல தொடக்கம், எனக்கு இந்த இரண்டு பாடல்களுமே பிடிக்கும்.  புதிய இசையமைப்பாளர் என்ற சுவடே தெரியாமல் அற்புதமாக கலக்கி இருந்தார்.

படம்:வாகை சூட வா 

பாடல்: சாரக்காத்து  வீசும் / போறானே போறானே

இவரும்  புதிய இசையமைப்பாளர்தான் பின்னணி இசையிலும் இந்த படத்தில் முத்திரை பதித்திருந்தார். தமிழ் சினிமாவில் இவருக்கென்று நல்ல எதிர்க்காலம் இருப்பதுபோல் தோன்றுகிறது.

படம் : சதுரங்கம் 

பாடல்: விழியும் விழியும்

வித்யாசாகரின் மெலடிகள் என்றும் சோடை போனதே இல்லை. இயக்குனர் கரு. பழனியப்பன் -வித்யாசாகரின் கூட்டணி நல்ல பாடல்களை கொடுத்து வந்திருக்கிறார்கள், அந்த வகையில்  படம் தாமதமாக வந்தாலும் இந்த பாடல் எனக்கு பிடித்து போய்விட்டது.

படம் : தெய்வத்திருமகள்

பாடல் : ஆரிரோ ஆராரிரோ

GV. பிரகாஷிற்கு  மேலும் ஒரு பிரமாதமான கதையம்சத்தோடு கூடிய பின்னணி இசைக்கு நிறைய வேலை கொடுத்த படம்.
 

படம்: 180 

பாடல்: சந்திக்காத கண்களில் 

இந்த படத்தின் இசையமைப்பாளர் "ஷரெத்" மலையாளத்தில் இசையமைத்து  வருகிறார். தமிழ் படங்களில் இதுதான் இவரின் முதல் படம்.

படம்: வெப்பம் 

பாடல்: மழை வரும் அறிகுறி

ஜோஷ்வா ஸ்ரீதரின் இசையில் வெளிவந்த காதல் படத்தின்பாடல்களை நாம் இன்னும் மறந்திருக்க  முடியாது. கொஞ்ச நாள் இடைவெளிக்கு பிறகு அவருக்கு பேர் சொல்லும்படியான படம் இது. குறிப்பாக இந்த பாடல் பிரமாதம்!!!

படம்: கோ 

பாடல்: என்னமோ ஏதோ

ஹாரிஸ் ஜெயராஜின் இந்த பாடல் இந்த வருடம் பல பேரின் விருப்பபாடலாக இருந்தது. 

படம்: எங்கேயும் காதல்

பாடல்: திமு திமு தீம் தீம்

நா. முத்துகுமாரின் வரிகளில்  ஹாரிஸ் ஜெயராஜின் இசையில் இந்த பாடல் கேட்கும்போது ரொம்பவே இனிமை. காதல் வராதவனுக்கு திடிரென காதல் வந்தால் எப்படி அவனுடைய மன ஓட்டங்கள் இருக்கும் என்பதை சொன்ன பாடல். சில கவிதை வரிகள் நச்சென்று இருக்கும்.

"ஜாமத்தில் விழிக்கிறேன்

என் ஜன்னல் துங்கும் நிலா 

காச்சலில் கொதிக்கிறேன்

என் கண்ணுக்குளே விழா "

நிறைய பாடல்களை இந்த வரிசையில் சேர்க்கத்தான்  அசை என்ன செய்வது பத்து  பாடல்தான் என்று முதலிலே முடிவு செய்துவிட்டேன்.

அன்புடன்

அசோக் குமார் 

காதலிக்க நேரமில்லை படமும் -இயக்குனர் ஸ்ரீதரும்

படத்தின் தலைப்புக்கு கிழே "கதையை எதிர்ப்பார்க்காதிர்கள்" என்று எழுதி படத்தை விளம்பரப்படுத்தி ஸ்ரீதர் அவர்கள் வெளியிட்ட படம்தான் "காதலிக்க நேரமில்லை".பெரும் புகழை அவருக்கு இந்த படம் பெற்று தந்தது என்றால் அது மிகை இல்லை. கதை முழுவதும் சின்னமலையில் நடப்பது போல் எடுத்திருந்தார் ஸ்ரீதர். இது முழுக்க முழுக்க நகைச்சுவை ஒன்றையே மயப்படுத்தி எடுத்திருந்ததால், கதை என்று அவர் பெரிதாக அலட்டிக்கொள்ளவில்லை போலும். அது போலவே முதன் முதலில் சப்டைட்டில் போட தமிழ் சினிமாவிற்கு கற்றுகொடுத்தவரும் ஸ்ரீதர் அவர்களாகத்தான் இருக்கும். 

கதையை சுருங்க சொன்னால், சின்ன 

 மலையில் பெரிய எஸ்டேட் வைத்திருக்கும் விஸ்வநாதனுக்கு இரண்டு மகள்கள். சென்னையில் படிப்பை முடித்து வீட்டுக்கு திரும்பிய அவர்களை ஒருநாள் வழியில் கேலி செய்கிறார் அசோக் (ரவிச்சந்திரன்). அவர்  தான் அந்த எஸ்டேட் காரியதரிசி என்று மகள்களுக்கு தெரியவர, அதை முதலாளி தந்தையிடம் போட்டுகொடுக்க வேலை நீக்கம் செய்யப்படுகிறார் ரவிச்சந்திரன். ஆனால் வேறு வேலைக்கு போகாமல் இவர் வீட்டின் முன்பே கூடாரம் அமைத்து ஆட்களை கூட்டி பாடி போராட்டம் செய்கிறார். 

இதன் நடுவே விஸ்வநாதனின் இளைய மகளுக்கும் ரவிச்சந்த்ரனுக்கும்   காதல் வர, பணமும் கௌரவமும் தடுக்க தன் உற்ற நண்பன் முத்துராமனை  (வாசு) இவரின் பணக்கார தந்தையாக நடிக்குமாறு அழைக்க வந்த இடத்தில்தான் இவரும் விஸ்வநாதனின் மகளையே காதலிப்பதாக சொல்ல குழப்பம் ,பின் முத்துராமன் காதலிப்பது இமுத்த மகள் காஞ்சனாவையும், ரவிச்சந்திரன் காதலிப்பது இளையமகள் ராஜஸ்ரீயையும் (நிர்மலா)  என்று தெளிவாக எப்படி இருவரும் காதலியை கரம் பிடித்தார்கள் என்பதை நகைச்சுவையோடு, இனிக்க இனிக்க எடுத்த படம்தான் இது. 

ரவிச்சந்திரன் இந்த படத்தில்தான் முதன் முதலில் அறிமுகமானார். முதல் படமே வெற்றி அல்ல மாபெரும் வெற்றி படமாக அமைந்தது. ஒரு ஓட்டை காரை வைத்துகொண்டு கஞ்சனாவிடமும், ராஜஸ்ரீயிடமும் இவர் அடிக்கும் லூட்டி ரசிக்க வைப்பவை. வயதான வேடத்தில் ரவிச்சந்த்ரனின் அப்பாவாக நடிக்கும் முத்துராமன் பிரமாதபடுத்தி இருப்பார். "காதலிக்க நேரமில்லை பாடலில் இவரின் நடனம் அசத்தல் ரகம் சிரித்து மகிழலாம்.

 படத்தின் நகைச்சுவை பகுதியை நாகேசும் சச்சுவும் எடுத்துகொள்கிறார்கள். படம் எடுக்க போகிறேன் என்று நாகேஷ் செய்யும் காமெடி அட்டகாசம். திகில் கதை சொல்கிறேன் பேர்வழி என்று இருட்டில் பாலையாவை உட்காரவைத்து படுத்தி எடுக்கும் காட்சி, சிரித்து சிரித்து கண்ணில் தண்ணீரை வரவைத்துவிடும். படகம்பனியின் பெயரை ஓஹோ ப்ரொடக்சன்ஸ் என வைத்திருப்பதற்குஇவர் சொல்லும் காரணம் அடடா..!!

 பாலையாவின் நடிப்புக்கு  எப்போதும்  நான் ரசிகன், மகள்களிடம் குலைவதும், நாகேஷிடம் படம் எடுக்க பணம் தரமாட்டேன் என முரண்டு பிடிப்பதும், ரவிச்சந்த்ரனை வேலை இல்லை என விரட்டுவதும், அவர் தந்தை பெரும் பணக்காரர் என தெரிந்தவுடன் பம்முவதும், அமர்க்களம்.

ஸ்ரீதர் அவர்களின்  படங்களில் இசைக்கென்று தனி முத்திரை இருக்கும், விஸ்வநாதன்-ராமமூர்த்தி அவர்களின் இசையில் பாடல்கள் அனைத்தும் ஆஹா  ரகம். "விஸ்வநாதன் வேலை வேணும்", "நாளாம் நாளாம் திருநாளாம்", "காதலிக்க நேரமில்லை", "அனுபவம் புதுமை அவளிடம் ", "உங்க பொன்னான கைகள்", "என்ன பார்வை உந்தன்" மற்றும் "மலரென்ற முகம் இன்று" என அனைத்து பாடல்களும் இன்றும் நம்மை மயங்க வைப்பவை.

 இப்படி நிறைய இன்னும் இரண்டு பதிவுகள் கூட எழுதலாம் அவ்வளவு சமாச்சாரங்கள் இருக்கிறது இந்த படத்தில். தமிழ்சினிமாவில் தவிர்க்க முடியாத படம் இது. !!!

ஸ்ரீதர் அவர்கள் பற்றிய முந்தைய பதிவுகளை படிக்க அதன் இணைப்புகள் கிழே!!
C.V.ஸ்ரீதர் -இயக்குனர்களில் ஒரு சகாப்தம் 
இயக்குனர் C .V . ஸ்ரீதரும் தேன் நிலவு படமும் 
நெஞ்சில் ஒரு ஆலயம் படமும் - இயக்குனர் ஸ்ரீதரும் 
நெஞ்சம் மறப்பதில்லை படமும் இயக்குனர் ஸ்ரீதரும்

இன்னும் ஸ்ரீதர் அவர்களின் படங்கள் பற்றிய பல சுவாரசியமான விசயங்களை அடுத்த பதிவில் பகிர்ந்துகொள்கிறேன் !!    

அன்புடன் 

அசோக் குமார்

காலத்தால் அழியாத பாடல்கள்-8

யேசுதாஸின் முதல் தமிழ் பாடல் இதுதான், மிகவும் மெதுவாக நகரும் பாடலும் ஆழமான வார்த்தைகளும் கொண்டது.
படம்: பொம்மை 

இசை : S . பாலச்சந்தர்

பாடியவர் : கே. ஜே. ஏசு தாஸ் 

********************************************************

படம்: வீர அபிமன்யு 

இசை : கே. வீ. மகாதேவன்

பாடியவர்கள் : பீ. பீ. ஸ்ரீனிவாஸ் 

கண்ணதாசனின் அற்புத  வரிகள் . பாடல் வரிகள் அனைத்தும் தேன் என முடியும் படி எழுதி இருப்பார் கவிஞர் .

****************************************************
படம்:என் அண்ணன்
பாடல்: கடவுள் ஏன்

இசை : கே. வீ. மகாதேவன்

பாடியவர்கள் : TMS

**************************************************
படம்:  பலே பாண்டியா
பாடல்; யாரை எங்கே ...

இசை : MS. விஸ்வநாதன்

பாடியவர்கள் : தமஸ்
கண்ணதாசன் அரசியலில் இருந்து வெறுத்து போய் இருந்த காலத்தில் எழுதியதாக இந்த பாடலை சொல்வார்கள்.

*************************************************
படம்: பூவா தலையா
பாடல்: மதுரையில் பறந்த

இசை : MSV

பாடியவர்கள் : TMS

**************************************************
அன்புடன்
அசோக் குமார் 

குரல் தேவதைகள்-சின்மயி

இந்த குரல் தேவதைகள் பற்றிய பதிவில் சென்ற பதிவில் "ஸ்ரேயா கோஷல்" பற்றி எழுதி இருந்தேன். அந்த பதிவை படிக்க இங்கே சொடுக்கவும். இந்த பதிவில் எனக்கு மிகவும் பிடித்த பாடகியான "சின்மயி" பற்றி கிறுக்கலாம் என்று இருக்கிறேன். 

ஸ்ரேயா கோஷலுக்கும், சின்மயிக்கும் ஒரு ஒற்றுமை உண்டு. இருவருமே தொலைக்காட்சியின் வாயிலாக திரைத்துறைக்கு வந்தவர்கள். சின்மயியும், "சப்தஸ்வரங்கள்" என்ற நிகழ்ச்சயில் பங்கேற்றபோது அந்த நிகழ்ச்சியின் சிறப்பு விருந்தினராக வந்திருந்த பிரபல பின்னணி பாடகர் "ஸ்ரீனிவாஸ்" இவர் குரலால் கவரப்பட்டு, இசையமைப்பாளர் "ரெஹ்மான்" அவர்களிடம் அறிமுகப்படுத்தினார். முதல் பாடலே "கன்னத்தில் முத்தமிட்டால்" படத்தில் ஒரு தெய்வம் தந்த பூவே" பாடல் மூலம் பிரபலமானார். யோசித்து பாருங்கள் முதல் பாடல் இவர் புது பாடகி, ரஹ்மான் அவர்களின் மன உறுதியை பாராட்டும் அதே வேளையில், இவர் திறமை மீது ரஹ்மான் அவர்கள் வைத்த நம்பிக்கைதான் முழுமுதல் காரணம். 

எல்லோருக்கும் வாய்ப்பதில்லை இது போன்ற ஒன்று, முதல் பாடலே ஹிட்டாவது. அந்த பாடல்தான் சின்மயிக்கு "தமிழ்நாட்டின் சிறந்த பின்னணி பாடகி விருதை அந்த வருடம் வாங் கொடுத்தது. சின்மயி பாடும்போது அதில் ஒரு ஜீவன் இருப்பதாகவே தோன்றுகிறது. அவரின் "நளதமயந்தி" படத்தின் "என்ன இது" பாடல் எனக்கு எப்போதும் பிடித்தமானது. இன்றும் எனக்கு நினைவில் இருக்கிறது, ரஹ்மான் அவர்களின் ஒரு இசைவிழாவில் ரஹ்மான் பியானோ வாசிக்க, சின்மயி அந்த பாடலை பாட அன்று முதல் தான் நான் சின்மயின் குரலுக்கு ரசிகனானேன்.

கர்நாடக இசை மட்டுமின்றி ஹிந்துஸ்தானி இசையிலும் சின்மயி கை தேர்ந்தவர். இவரது அம்மாவே இவருக்கு கர்னாடக இசையின் குரு என்பது இன்னமும் சுவாரசியமான சங்கதி.

இன்றும் ரஹ்மானின் ஆஸ்தான பாடகர்களில் சின்மயிக்கும் ஒரு இடம் உண்டு, உதாரணம் அவர் இசையமைக்கும் எல்லா படங்களிலும் ஒரு பாடல் நிச்சயம் இவர் பாடியதாக இருக்கும். ரஹ்மான் என்றில்லை இன்று வளர்ந்து வரும் புதிய இசையமைப்பாளர்களுக்கும் இவர் பிடித்தமான பாடகி.சமீபத்தில் வெளிவந்த இந்த இரண்டு பாடல்களும் புதிய இசையமைப்பாளர்களின் இசையில் மிகப்பெரும் வரவேற்ப்பை பெற்றவை.

சின்மயி ஒரு பாடகி மட்டுமில்லை, பெரும்பாலும் பல நடிகைகள் இன்று இவரின் குரலில்தான் பரிமளிக்கிறார்கள். "சில்லுனு ஒரு காதல்" படத்தில் பூமிகாவுக்கு குரல் கொடுத்ததுதான் இவரின் முதல்அனுபவம். அதன் பிறகு வரிசையாக "விண்ணைத்தாண்டி வருவாயா" வில் த்ரிஷா, "கோ" கார்த்திகா தொட்டு, இன்று ஹிந்தி பதிப்பு "விண்ணைத்தாண்டி வருவாயா"ஏமி ஜாக்சன் வரை முப்பது படங்களுக்கு மேல் நடிகைகளுக்கு குரல் கொடுத்துள்ளார். சில்லுனு ஒரு காதல்" படத்தின் ஒரு காட்சியை மட்டும் பாருங்களேன்.

பாடகி, பின்னணி குரல் கொடுப்பது என்பதை தாண்டி , த்வீட்டர், பேஸ் புக், "WhatToNameIt" என்ற  ப்ளோக்கையும்எழுதி வருகிறார்.  "ப்ளூ எலிபன்ட் " என்ற மொழிபெயர்ப்பு நிறுவனத்தின் தலைவராகவும் இருக்கிறார். இவை எல்லாம் இவரின் பன்முகத்தன்மைக்கு எடுத்துகாட்டு. தமிழ், ஆங்கிலம் மட்டுமின்றி ஜேர்மன், பிரெஞ்சு தெலுங்கு, மலையாளம் ஆகிய மொழிகள் சரளமாக தெரிந்தவர் (நன்றி: http://www.nilacharal.com/enter/celeb/chinmayi.asp).

இன்னமும் நெறைய எழுதிக்கொண்டே போகலாம்தான். நேரம் கிடைத்தால், அதை தனி பதிவாக போடுகிறேன்.


டிஸ்கி: இது என் நூறாவது பதிவு. இதில் எனக்கு மிகவும் பிடித்த பாடகியான சின்மயி பற்றி எழுதியதில் பேரானந்தம் தான்.

அன்புடன் 

அசோக் குமார்

நெஞ்சம் மறப்பதில்லை படமும் இயக்குனர் ஸ்ரீதரும்

தமிழ் சினிமாவில் ஸ்ரீதர் என்றாலே புதுமை என்றும் பொருள் கொள்ளலாம். பரீட்சார்த்தமான திரைப்படங்களை படித்ததில் அவருக்கு நிகர் அவரே. குடும்ப படமும் எடுப்பார், காமெடி படமும் எடுப்பார், முன்ஜென்ம கதையையும் எடுப்பார். "நெஞ்சில் ஒரு ஆலயம்" படத்திற்கு பிறகு இவர் எடுத்த படம் "போலீஸ்காரன் மகள்" இந்த படத்திற்கு பிறகு இவர் எடுத்த படம் தான் "நெஞ்சம் மறப்பதில்லை" புனர்ஜென்ம கதையை மயமாக்கி எடுத்த படம். 

ஸ்ரீதர் அவர்கள் எடுத்த படங்கள் சமகாலத்தில் ஒரு டிரென்ட் செட்டேராக இருந்ததார் என்றால் அது மிகை இல்லை. முக்கோண காதல் கதையை சுவைபட படமாக்கி வந்த ஸ்ரீதர், ஒரு புது முயற்சியை எடுத்தது இந்த படத்தில்தான். புனர் ஜென்மத்தில் காதலிக்கும் ஒரு ஜமீன்தாரின் மகனான கல்யாண் குமாருக்கும், ஏழையான தேவிகாவுக்கும்காதல், இது பிடிக்காத நம்பியார் தேவிகாவை கொன்று விட அந்த காதல் முற்று பெறாமல் போகிறது. இந்த பிறவியில் தன் நண்பனை பார்க்க அவன் ஊருக்கு வரும் கல்யாண்குமாருக்கு, பழைய புனர்ஜென்ம நினைவுகள் வர, அதே தேவிகா தன் நண்பனின் சகோதரியாக, இவர்களின் காதலை பிரித்த கல்யன்குமாரின் தந்தையான நம்பியார் இன்னும் உயிரோடு இருந்து இந்த விஷயம் அவருக்கும் தெரியவர முடிவு என்ன என்பதை திகில் படத்துக்கே உரிய திரைக்கதையுடன் படமாக்கி இருப்பார் ஸ்ரீதர். 

கல்யாண்குமாரின் தந்தையாக "நம்பியார்" நடித்திருப்பார், இவர் கண்ணிலேயே ஒரு கொடூரத்தனத்தை பார்க்கலாம். இரண்டாம் ஜென்மத்திலும் இவர்களின் நிலையை தெரிந்துகொண்ட நம்பியார், தேவிகாவை  கொல்ல முயற்சிக்கும் அந்த காட்சி அவரின் நடிப்பிற்கு ஒரு சாட்சி. வயதான வேடத்திற்கு இவரின் ஒப்பனையும் பிரமாதமாக இருந்தது. 

வழக்கமாகவே ஸ்ரீதர் அவர்களின் படங்களில் பாடல்கள் அமர்க்களப்படுத்தும், இந்த படத்தில் இரண்டே பாடல்கள்தாம், "நெஞ்சம் மறப்பதில்லை" மற்றும் அழகுக்கும் மலருக்கும் " என அருமையாக இசையமைத்திருந்தார் MS . விஸ்வநாதன் அவர்கள். இந்த நெஞ்சம் மறப்பதில்லை பாடல் மட்டும் இரண்டு மூன்று முறை மாறி மாறி வரும். இந்த படத்தில் பின்னணி இசையிலும் பரிமளித்திருப்பார் விஸ்வநாதன்.

ஸ்ரீதர் அவர்களின் திரை வரிசையில் முக்கியமானதோர் படமாக "நெஞ்சம் மறப்பதில்லை" அமைந்தது என்றால் அது மிகையில்லை. ஸ்ரீதர் அவர்களிப்பற்றிய இன்னும் சுவையான செய்திகளோடு அடுத்த பதிவில் தொடர்கிறேன். ஸ்ரீதர் அவர்களிப்பற்றிய தொடர்பதிவினை படிக்க கிழே சொடுக்கவும். 

 C.V.ஸ்ரீதர் -இயக்குனர்களில் ஒரு சகாப்தம் 
இயக்குனர் C .V . ஸ்ரீதரும் தேன் நிலவு படமும்
நெஞ்சில் ஒரு ஆலயம் படமும் - இயக்குனர் ஸ்ரீதரும்

அன்புடன் 

அசோக் குமார்

குரல் தேவதைகள் - ஸ்ரேயா கோஷால்

தமிழ் சினிமாவில் இந்த தலைமுறை பெண் பாடகிகளைப்பற்றிய தொகுப்புதான் இந்த பதிவு. தன் குரலால் மட்டுமல்ல தன் அழகாலும் நம்மை எல்லாம் ஈர்த்த அந்த "குரல் தேவதைகளைப்பற்றிய சிறு செய்திகள். ஜானகி, சித்ரா, சொர்ணலதா போன்றோர் காலம் போக இப்போது இவர்கள்தான் தமிழ் சினிமாவில் முக்கிய பாடகிகள்.
ஸ்ரேயா கோஷால் :

மெலடி பாடல்கள் பாட, இன்றைய இசை அமைப்பாளர்களின் முதல் முன்னுரிமை ஸ்ரேயாவுக்கே. பிறந்தது பெங்காலில் என்றாலும் வளர்ந்தது ராஜஸ்தானில். தன் ஆறாவது வயதிலேயே பாடி அரங்கேற்றம் நடத்தினார். முதன் முதலில் "ஜீ டிவி" நடத்திய, நம்ம ஊரு " ராக மாலிகா" போல இன்றும் "ச ரீ க ம ப" என்ற நிகழ்ச்சியின் மூலம் வெற்றி பெற்று கொஞ்சம் பிரபலமடைந்தார்.

பாலிவூடின் சிறந்த இயக்குனர் "சஞ்சய் லீலா பன்சாலி" அவர்களின் பார்வை இவர் மேல் பட்டது, அடுத்து அவர் எடுத்த "தேவதாஸ்" படத்தில் இவருக்கு ஐந்து பாடல்கள் பாடும் வாய்ப்பை வழங்கினார், அதோடு மட்டுமில்லாமல் பார்வதியாக நடித்த "ஐஸ்வர்யாவுக்கும் இவர்தான் குரல் கொடுத்தார். இந்த படத்தின் "டோலாறே"  பாடலுக்காக "இந்திய அரசின் தேசிய விருதை பெற்றார்.

இவரை தமிழ் திரை உலகிற்கு அறிமுகம் செய்த பெருமை இசையமைப்பாளர் "கார்த்திக் ராஜா" அவர்களயே சேரும். "ஆல்பம் " என்ற தமிழ் படத்தின் "செல்லமே செல்லமே" என்ற பாடலை பாடி அறிமுகமானார்.

 ஹிந்தி, தமிழ் மட்டுமின்றி தெலுங்கு, மலையாளம், போஜ்புரி, பெங்காலி, கன்னடா, மராத்தி, நேபாளி, குஜராத்தி, ஒரியா என பல மொழிகளில் இன்றும் பின்னணி பாடகியாக வளம் வந்துக்கொண்டு இருக்கிறார். இந்த மொழிகளின் முன்னணி இசை அமைப்பாளர்கள் அனைவர் இசையிலும் பாடிய பெருமையும் இவருக்கு இருக்கிறது. தமிழில் இவரை பிரபலப்படுத்தியது, யுவன் ஷங்கர் ராஜா இசையில் இவர் பாடிய "நினைத்து நினைத்து" என்ற பாட்டுதான்.

A.R.ரெஹ்மான் இசையில் இவர் பாடிய அனைத்து பாடல்களும் ஹிட். "முன்பே வா", "மன்னிப்பாயா" "கள்வரே கள்வரே" என்று ஒரு பட்டியலும், இளையராஜா இசையில் "இளம்காத்து வீசுதே" "பூவைக்கேளு காத்தை கேளு" உன்னவிட ",  யுவன் ஷங்கர் ராஜா இசையில் "நினைத்தி நினைத்து", "சண்டாளி உன் " என பெரும் பட்டியலே உண்டு.

இதுவரை 4 தேசிய விருதுகளும், 9 பிலிம் பேர் விருதுகளும், 4 IIFA  விருதுகளும் இதுவரையில் பாடியதற்காக வாங்கியுள்ளார் என்பது குறிப்படத்தக்க சாதனை. ட்வீடரில் மட்டுமில்லாது இவருக்கென்று ஒரு  வலைதளமும்  பிரத்யேகமாக வைத்துள்ளார். சினிமாவில் கதாநாயகியாக நடிக்க வைக்க இவரை பல இயக்குனர்கள் அணுகி வருகிறார்கள். ஆனாலும் இவர் ஏதும் ஈடுபாடு காட்டிக்கொள்ளவில்லை, பொறுத்திருந்து பார்ப்போம். இன்னும் இவர் இசை உலகில் பெரும் சாதனைகள் செய்ய நம் வாழ்த்துக்கள் !!

அன்புடன் 

அசோக் குமார்

நெஞ்சில் ஒரு ஆலயம் படமும் - இயக்குனர் ஸ்ரீதரும்

ஒரு மருத்துவமனை மற்றும் மூன்று முக்கிய கதாபாத்திரங்கள் அவ்வளவுதான் இதை மட்டும் வைத்துகொண்டு ஒரு திரைக்காவியத்தை உருவாக்க முடியுமா ??முடியும் என காட்டியவர்தான் ஸ்ரீதர் அவர்கள். "தேன் நிலவு" படத்தின்  வெற்றிக்கு  பின் ஸ்ரீதர் அவர்களின் இயக்கத்தில் வெளிவந்து கலக்கிய படம்தான் "நெஞ்சில் ஒரு ஆலயம். இந்த படத்தில் ஒரு சின்ன முக்கோண காதலை மயமாக கொண்டு இவரகளுக்குள் நடக்கும் சுவையான உரையாடலை சின்ன சின்ன காட்சிகள் மூலம் காட்சி படுத்தி அமர்க்களபடுத்தி இருப்பார் ஸ்ரீதர். 

மொத்தம் பதினெட்டு நாட்களில் மொத்த  படத்தின் காட்சிகளை எடுத்து முடித்துவிட்டார்  ஸ்ரீதர். இந்த படத்தில் "முத்துராமன்" (நடிகர் கார்த்திக்கின் தந்தை) மற்றும் "தேவிகா" (நடிகை கனகாவின் அம்மா ) என்று இந்த படத்திற்கு பின்னால் தமிழ் திரை உலகில் பிரபலமாக வலம் வந்த இந்த இருவரையும் இந்த படத்தில் அறிமுகப்படுத்தியவர் ஸ்ரீதர்.

இந்த படத்தின் கதை ஸ்ரீதர் அவர்களின் பட பார்மூலவான முக்கோண காதல் கதைதான் இந்த படத்திலும் படமாக்கி இருந்தார்.  புற்றுநோயால் பாதிக்கப்பட்ட முத்துராமனை அவரது மனைவியான தேவிகா, புற்று நோயில் சிறந்து மருத்துவம் பார்க்கும் கல்யாண் குமாரின் மருத்துவமனையில் சேர்க்கபடுகிறார். பிறகுதான் தெரியவருகிறது, கல்யாண்குமாரும் தேவிகாவும் காதலித்து பிரிந்தவர்கள் என்று. முன்னாள் காதலியின் கணவரை காபற்றினாரா  அல்லது முடிவுதான் என்ன என்பதை மிக சுவாரசியமான திரைக்கதை அமைப்புடன் வெளிவந்த படம் இது. 

இந்த படத்தின் பாடல்கள் அனைத்தும் மிகப்பிரபலம், இசை அமைத்தவர் விஸ்வநாதன் மற்றும் ராமமூர்த்தி அவர்கள். இதில் பகிர்ந்துகொள்ளவேண்டிய ஆச்சர்யமான செய்தி என்னவென்றால், இசைக்கு மிகவும் முக்கியத்துவம்  கொடுப்பாராம் ஸ்ரீதர். அவரை இசை விசயத்தில் திருப்தி படுத்துவது சிரமம் என்று விஸ்வநாதன் அவர்கள் ஒரு சந்திப்பில் சொன்னது.  

படத்தின் எல்லா பாடல்களையும் கவியரசர் கண்ணதாசன் அவர்களே எழுதினர்.  "எங்கிருந்தாலும் வாழ்க" நினைப்பதெல்லாம் நடந்துவிட்டால்", " சொன்னது நீதானா", "முத்தான முத்தல்லவோ" , " என்ன நினைத்து என்னை" என மொத்தம் ஐந்து பாடல்கள். 

அந்த காலத்தில் ஒரு இயக்குனரை கல்லூரி பெண்கள் காதலித்தார்கள் என்றால் அது காதல் பட மன்னன் ஸ்ரீதர் அவர்களை மட்டுமே. இன்னும் சுவாரசியமான சில தகவல்களுடன் அடுத்த பதிவில் இயக்குனர் ஸ்ரீதர் அவர்களுடன் சந்திக்கிறேன் .

C.V.ஸ்ரீதர் -இயக்குனர்களில் ஒரு சகாப்தம்

தமிழ் சினிமாவில் எண்ணற்ற இயக்குனர்கள் வந்து போனாலும், தனக்கென்று நிலையான இடத்தை பிடித்துக்கொண்டு நிலைத்து நிற்பது ஒரு சவாலான காரியமே. அதிலும் 1950 - 1960  காலகட்டங்களில் பெரும்பாலும் புராண மற்றும் சரித்திர படங்களும், ராஜ ராணி கதைகளிலேயே, தமிழ் சினிமா முடங்கி கிடந்தது. அதை தகர்த்தெறிந்து குடும்ப கதைகளையும், காதல் பிரிவு மற்றும் முக்கோண காதல் அனா பல பரிமாணங்களில் தமிழ் சினிமாவை மிளிர வைத்த இயக்குனர்தான் "ஸ்ரீதர்".தன்னுடைய முதல் படமான "கல்யாண  பரிசு" படத்திலேயே தான் ஒரு வித்தியாசமான இயக்குனர் என்பதை காட்டினார்.

செங்கல்பட்டுக்கு  அருகில் "சித்தமூர்" என்ற கிராமத்தில் 1933 -இல் பிறந்தார். தனது பதிமூன்று வயதில் மேடை நாடகங்கள் எழுத ஆரம்பித்து அதை பள்ளி மேடைகளில் அரங்கேற்றினார். முதன் முதலில் அவருடைய கதையான "ரத்த பாசம்" படமாக எடுக்கப்பட்டபோது அந்த படத்திற்கு வசனம் எழுதும் பொறுப்பை ஏற்றார். இதுதான் அவரின் முதல் திரை உலக அவதாரம்.

இயக்குனராக இவர் எடுத்த முதல் படம் 1959 -ம் ஆண்டு வெளிவந்த "கல்யாண பரிசு ". ஜெமினி கணேசன், சரோஜா தேவி நடிப்பில் முக்கோண காதல் கதையை படமாக்கி இருந்தார் ஸ்ரீதர். சந்தர்ப்ப சூழ்நிலைகளால் காதலித்த பெண்ணின் சகோதரியை மணந்துகொள்ளும்  நிலைக்கு ஆளாகும் ஒருவன், மற்றும் அவன் காதலி இவர்களின் மனோ நிலையை அற்புதமாக படமாக்கி இருந்தார் ஸ்ரீதர்.


சரோஜா தேவியின் சகோதரியாக விஜயகுமாரி நடித்திருப்பார். இன்றும் காதல் தோல்விக்கு சிறந்த பாடலாக "காதலிலே தோல்வியுற்றான் காளை" என்ற பாடல் விளங்கிக்கொண்டு இருக்கிறது என்றால் அது மிகை இல்லை. "வாடிக்கை மறந்தது ஏனோ", "உன்னை கண்டு நான் ஆட" "துள்ளாத மனமும் துள்ளும்" என அனைத்து பாடல்களும்  AM. ராஜா இசையில்  பிரசித்தி பெற்ற பாடல்தாம்.   இந்த படத்தில் தங்கவேலுவின் நகைச்சுவை பெரும் வரவேற்பை பெற்றது.

 இந்த படத்தை பற்றி நினைக்கையில் சுவாரசியமான ஒரு நிகழ்வு எனக்கு எனக்கு ஞாபகம் வருகிறது இதை எங்கேயோ படித்தேன் என்பது மறந்து விட்டது. அந்த நாட்களில் கவிஞர்  " பட்டுகோட்டை கல்யாண சுந்தரம்" அவர்கள் புரட்சிகர கருத்துக்களை திரை பாடல்கள் வழியே புகுத்துவதில்  பெயர் பெற்றவர். இந்த படத்திற்கு யாரை பாடல்கள் எழுத வைக்கலாம் என்ற வந்தபோது கல்யாண சுந்தரம் அவர்களை எழுத வைப்பது என பேச்சு அடிபட்டபோது ஸ்ரீதர் மறுத்துவிட்டாராம். ஏன் என கேட்டபோது இது முழுக்க முழுக்க காதல் படம் இதில் எங்கே புரட்சி கருத்துக்கு இடம் என்றாராம். பின் ஒருவாறு ஏற்றுக்கொண்டு கல்யாணசுந்தரம் அவர்களிடத்திலேயே கேட்டுகொண்டாராம் ஸ்ரீதர். தயைகூர்ந்து உங்கள் பாணி வரிகள் வராமல் பார்த்துக்கொள்ளுங்கள் என. பட்டுகோட்டையாரும் ஒத்துக்கொண்டு இந்த படத்திற்கு மொத்த பாடல்களை எழுதி முடித்தாராம்.பாடல்களை கேட்ட ஸ்ரீதர் அவர்களுக்கு மிகவும் திருப்தி. கவிஞரை பார்த்து, புரட்சி கருத்துகள் வராமல் எழுதியமைக்கு நன்றி என்றாராம் ஸ்ரீதர். உடன் பட்டுகோட்டையார், நான் என் கம்யுனிச கருத்துகளையும் இதில் எழுதி இருக்கிறேன் "உன்னை கண்டு நான் வாட (சோக பாடல்) பாடலை பொய் இன்னொரு முறை கேளுங்கள் அந்த பாடல்  அன்றாடம் கூலி வேலை செய்யும் ஏழைக்கும்  பொருந்தி வரும் என்றாராம் அதுதான் பட்டுகோட்டை. நீங்களும்தான் கேளுங்களேன் !!

இன்னும் பல சுவாரசியமான பல தகவல்கள், ஸ்ரீதர் அவர்கலப்பற்ற்யும், அவர் படங்கள் பற்றியும் அடுத்த பதிவில் பகிர்ந்துகொள்கிறேன்.

அன்புடன் 

அசோக் குமார்

காலத்தால் அழியாத பாடல் - பகுதி 6

இந்த பாடல்களை எல்லாம் தொகுப்பதில் நிச்சயம் எனக்கு நிறையவே ஆனந்தம். கேட்க கேட்க திகட்டாத பாடல்கள் இவை.

படம்: முத்தான முத்தல்லவோ

பாடல்: எனக்கொரு காதலி

இந்த பாடல் கண்ணதாசன் எழுத MSV அவர்களும் SPB யும் இணைத்து பாடிய பாடல்.

படம்: ஆறிலிருந்து அறுபது வரை

பாடல்: கண்மணியே காதல் என்பது

ரஜினி நடிப்பில் இந்த படம்ஒரு மைல்கல், எந்த ஸ்டைல் மற்றும் பில்ட்அப் இல்லாமல் நடித்த படம் இது.

படம்: ஆசை முகம்

பாடல்: எத்தனை பெரிய
MGR அவர்களின் தத்துவ பாடல் வரிசையில் என்றும் நீங்க இடம் பிடித்த பாடல் இது 

படம்: அவர்கள்

பாடல்: ஜூனியர் ....
தன் காதலை இந்த பொம்மை வாயிலாக அழகாக வெளிப்படுத்தி நடித்திருப்பார் கமல்.

படம்:பெரிய இடத்து பெண் 

பாடல்:அன்று வந்ததும் அதே ...

இந்த காலத்தால் அழியாத பாடல்கள் தொகுப்புகள் இன்னும் தொடரும் !!

அன்புடன்

அசோக் குமார்

தமிழ் சினிமா மறந்துவிட்ட இசைஅமைப்பாளர்கள்- V .குமார்

தமிழ் சினிமாவில் இசைக்கென்று எப்போதும் முக்கியம் உண்டு. ஒரே படத்தில் 30  பாடல்களும் உண்டு, பாடல்களே இல்லாத படமும் உண்டு. இதில் "திருச்சி லோகநாதன்" தொட்டு இன்றைய "யுவன் ஷங்கர் ராஜா" வரை எல்லோரும் நட்சத்திரங்களாக மின்னி வருகின்றனர். இதில் திறமை இருந்தோ இல்லாமலோ இந்த இசை துறைக்கு வந்து மின்னமலேயே மறந்த, மறைந்த இசை அமைப்பாளர்களை பற்றி கொஞ்சம் விரிவாக அலசலாம் என்று இருக்கிறேன்.

குட்டுபட்டாலும் மோதிர கையால் குட்டுபடவேண்டும் என்று ஒரு வாக்கு உண்டு. அது போல "இயக்குனர் சிகரம்" பாலச்சந்தர் அவர்களால் "நீர் குமிழி படத்தில் அறிமுகபடுத்தப்பட்டு மெலடி கிங் என  பட்டம் பெற்ற V .குமார் அவர்களை பற்றிதான் இந்த பதிவில் எழுத இருக்கிறேன்.

 

முதலில் மியூசிக் கண்டக்டராக தன் பணியை ஆரம்பித்த குமார் அவர்களுக்கு பாலச்சந்தர் அவர்கள்  முதல் வாய்ப்பை கொடுத்தார். ஹார்மோனியம், பியானோ வாசிப்பதில் வாசிப்பதில் கை தேர்ந்தவர் குமார் அவர்கள்.  முதல் படத்தில் இவருக்கு இசை உதவிகளை செய்தது சேகர் என்ற மனிதர். இவர் வேறு யாருமல்ல இசை புயல் A .R . ரஹ்மானின் தந்தை. முதல் படத்திலேயே "ஆடி அடங்கும் வாழ்க்கையடா" என்ற பாடலை கொடுத்து தானும் ஒரு திறமைசாலி என்பதை திரை உலகிற்கு காட்டினார்.  சீர்காழி அவர்களின் கந்தர்வ குரலில் இந்த தத்துவ பாடலை கேட்போர் மெய்சிலிர்ப்பர்.

 

 1960 களில்  வெளிவந்த எல்லா பாலச்சந்தர் படங்களான நீர் குமிழி, எதிர் நீச்சல், இரு கோடுகள், அரங்கேற்றம், மேஜர் சந்திரகாந்த், வெள்ளி விழா என எல்லா படங்களுக்கும் இசை அமைத்தவர் நம்   V .குமார். 

முதல் படத்தில் இசை அமைக்க வாய்ப்பு பெற்றபோது இதை தன்னால் சிறப்பாக செய்ய இயலுமா என அச்சப்பட்டு இந்த வாய்ப்பை இழக்க இருந்தவர்தான் நம் V .குமார், ஆனாலும் பாலச்சந்தர் அவர்களின் ஊக்கத்தினாலும் சேகர் அவர்களின் பக்கபலத்தாலும் அவர் இசை உலகில் அடி எடுத்து வைத்தார்.

"வெள்ளி விழா" படத்தில் இவர் செய்த ஒரு மாறுதல் தமிழ் சினிமாவிற்கு  மிகுந்த ஆச்சர்யத்தை கொடுத்தது என்றால் மிகை இல்லை. சுசீலா அவர்கள் மென்மையான பாடல்களையும் LR . ஈஸ்வரி அவர்கள் கொஞ்சம் மேலான குரலுடனும் அதுவரை பாடி மக்களுக்கு பரிச்சயப்பட்டு இருந்தனர். V .குமார் இவர்களுக்கு பாடல்களை மாற்றி கொடுத்து LR . ஈஸ்வரி அவர்களால் மென்மையாகவும் பாட முடியும் என நிருபித்த பாடல்தான் "காதோடுதான் நான் பேசுவேன்" என்ற பாடல்.

இசை ஜாம்பவான்கள் MS . விஸ்வநாதன் மற்றும் KV .மகாதேவன் அவர்களின் அலையில் இவர் பெயரும் காணமலேயே போனது இவரின் துரதிர்ஷ்டம்தான். ஆனாலும் காலம் உள்ளவரை இவரது பாடல்களான "தாமரை கன்னங்கள், அடுத்தாத்து அம்புஜத்தை, நான் உன்னை வாழ்த்தி பாடுகிறேன், உன்னிடம் மயங்குகிறேன் உள்ளதால் நெருங்குகிறேன் போன்ற பாடல்கள் மூலம் குமார் அவர்கள் நினைவில் நம்  நிற்பார் என்பது திண்ணம்.

தகவல் தொகுப்பு :

• V.Kumar Compositions
• Cinema Express article on V.Kumar - Part -1
• Cinema Express article on V.Kumar - Part -2
• Cinema Express article on V.Kumar - Part -3
• V.Kumar - Malarum NinaivugaL

அன்புடன் 

அசோக் குமார் 

காலத்தால் அழியாத பாடல்கள்- வாணி ஜெயராம் -2

முந்தைய பதிவில் வாணி ஜெயராமின் பாடல்களை தொகுத்து இருந்தேன். இந்த பதிவில் இன்னும் இனிமையான வாணி ஜெயராம் பாடிய பாடல்களை இணைத்திருக்கிறேன்.

    படம் : ரோசா பூ ரவிக்கைக்காரி

பாடல்: என்னுளில் எங்கோ 

இசை : இளையராஜா

படம் : மூன்று முடிச்சு

பாடல்: வசந்த கால 

இசை : MSV

படம் : மூன்று முகம்

பாடல்: டிஸ்கோ ராமா

இசை : இளையராஜா 

படம் : கன்னி தெரியும் கதைகள்

பாடல்: நான் உன்ன நெனச்சேன் 

இசை : சங்கர் கணேஷ் 

படம் : அன்புள்ள ரஜினிகாந்த்

பாடல்: தேன் பூவே

இசை : இளையராஜா 

 அன்புடன் 

அசோக் குமார் 

காந்திமதி - மின்னாமலே மறைந்த நட்சத்திரம்

பதினாறு வயதினிலே படத்தை பார்த்தவர்கள் சப்பாணி, மயிலு , பரட்டையை மட்டும் ரசிக்கவில்லை, "குருவம்மா" என்ற அடாவடியான கதாபாத்திரத்தில் நடித்த காந்திமதியையும்தான். கோழி காணமல் போனதும் இவர் அடிக்கும் சண்டையும், காணமல் போன கோழி கிடைத்தவுடன் இவர் பதறும் காட்சியும் குணசித்திர நடிப்பில் தனக்கென ஒரு பாணியை வகுத்து கொண்டு இவர் செய்த பாத்திரங்களில்தான் எத்தனை வித்தியாசம்.

 

 கிராமத்து வேடம் என்றால் அதற்கென தனி அடையாளத்தை ஏற்படுத்திவிடும் அளவுக்கு அந்தந்த பாத்திரங்களை தன் நடிப்பால் சிறக்க வைத்தவர். கரகாட்டக்காரன் படத்தில் இவர் ராமராஜனின் அம்மா வேடத்தில் கலக்கி இருப்பார். அதுமட்டுமின்றி சின்னதம்பி பெரியதம்பி, மண்வாசனை, கிழக்கே போகும் ரயில், முத்து மற்றும் ராசையா போன்ற படங்களிலும் தன் முத்திரை நடிப்பால் நம்மை எல்லாம் கவர்ந்தார். 

இதுவரை 300  படங்களில் நடித்துள்ள காந்திமதி நேற்று இதய நோயால் பதிக்கப்பட்டு மறைந்தது தமிழ் திரை உலகத்திற்கு பேரிழப்பு. இவர் திறமைக்கு தமிழ் திரை உலகம் சரியான அங்கிகாரம் கொடுக்கவில்லையோ என்று கூட தோன்றுகிறது. எப்படியோ அவரின் ஆன்மா சாந்தி அடைய இறைவனை வேண்டுகிறேன். 

அன்புடன்

அசோக் குமார்

காலத்தால் அழியாத பாடல்கள் -வாணி ஜெயராம் -1

வாணிஜெயராம், தனியே தெரியும் குரலுக்கு சொந்தக்காரர். சுசீலா, ஜானகி மற்றும் LR . ஈஸ்வரி  இவர்கள் காலத்தில் தனக்கென தனி அடையாளத்தை ஏற்படுத்திக்கொண்டு பின்னணி பாடகியாக நிலை நிறுத்திக்கொண்டவர். அவரின் பாடல்களை சிறு பகுதிகளாக தொகுத்து இருக்கிறேன் .  

படம் : அழகே உன்னை ஆராதிக்கிறேன்

பாடல் ; நானே நானா

இசை :இளையராஜா 

படம் : இளமை ஊஞ்சலாடுகிறது

பாடல்: ஒரே நாள் உன்னை நான்

இசை : இளையராஜா

படம் :  வைதேகி காத்திருந்தாள்

பாடல்: இன்றைக்கு ஏன் இந்த

இசை : இளையராஜா 

படம் : ஒத்தையடி பாதையிலே

பாடல்: செப்பு குடம்

இசை : சங்கர் கணேஷ்  

படம் : நிழல் நிஜமாகிறது

பாடல்: இலக்கணம் மாறுதோ

இசை : MSV

படம் : ஒரு கைதியின் டைரி

பாடல்: இது ரோசா பூவு

இசை : இளையராஜா 

 அன்புடன் 

அசோக் குமார் 

தமிழ் சினிமாவில் சோபிக்காத வாரிசுகள்- சிபி ராஜ்

எல்லா துறையிலும் தங்கள் வாரிசுகளை புகுத்தி மிளிரவைக்க வேண்டும் என்பது அரசியல் மற்றும் சினிமா துறையில் வாடிக்கை அதற்கு விதிவிலக்கானவர் மக்கள் கலைஞர் ஜெய்ஷங்கர் மட்டுமே. இதற்க்கு முன் எழுதிய பதிவுகளின் வரவேற்ப்பு காரணமாக இந்த தொடர் பதிவை விடாமல்  எழுதிக்கொண்டு இருக்கிறேன்.

"தகடு தகடு" என்ற ஒரு வார்த்தையை மட்டும்  சொல்லி, கையை பிசைந்து முலையை மட்டும் காட்டி வந்த  தமிழ் சினிமா வில்லன்களில் இருந்து மாறுபாட்டை காட்டியவர் "புரட்சி தமிழன்" சத்யராஜ். ஆரம்ப கால சினிமாவில் சிறு கதாபாத்திரங்களில் நடித்தாலும் "காக்கி சட்டை" படத்திற்கு இவரின் மீது எல்லோர் பார்வையும் பட ஆரம்பித்தது. "நூறாவது நாள்" படத்தின் மூலம் கொடூரமான வில்லனாக பரிமளித்தார்.  நூறாவது நாள், எனக்குள் ஒருவன், மூன்று முகம், நான் சிகப்பு மனிதன் போன்ற படங்களின் மூலமும் சிறந்த வில்லனாக ஜொலித்தார்.

இயக்குனர் சந்தன பாரதியின் "கடமை கண்ணியம் கட்டுப்பாடு படத்தில் அறிமுகமானார்.   இவர் கதாநாயகனாக நடித்த "கடலோரக்கவிதைகள்" படத்தில் சிறந்த கதாப்பாத்திரத்தில் இவரை நடிக்க வைத்து இவரை நட்சத்திர அந்தஸ்தை பெற்று தந்தது.

இயக்குனரும், நடிகருமான மணிவண்ணன் இயக்கத்தில் இவர் நடித்த படங்கள் அனைத்தும் பெரிதும் பேசப்பட்டன. கவுண்ட மணியுடன் இவர் சேர்ந்து நடித்த படங்களில் இருவரின் லொள்ளுகளுக்கு அளவே இருக்காது. தமிழ் சினிமா உலகில் மினிமம் கியாரண்டி நாயகனாக வலம் வந்தார் சத்யராஜ்.  எண்பதுகளிலும் தொண்ணூறுகளிலும் வருடத்திற்கு நான்கு படங்களுக்கு குறையாமல் நடித்து வந்தார். இன்னொரு பெருமையும் இவருக்கு உண்டு, தமிழ் சினிமாவை தவிர வேறு எந்த மொழிகளிலும் இவர் இதுவரை  தலை காட்டியதே இல்லை.

மக்கள் திலகம் எம்ஜிஆரின் அதிதீவிர ரசிகர். ஒரு முறை எம்ஜீஆரை இவர் சந்தித்தபோது, உனக்கு என்ன வேண்டும் என கேள் என இவரை கேட்டாராம்  எம்ஜீஆர். இவருக்கு என்ன கேட்பது என தெரியாமல் நீங்கள் உடற்பயிற்சி சேயும் கருவிகள் ஏதாவது இருந்தால் கொடுங்களேன் என கேட்க. உடனே எம்ஜீஆர் தான் உடற்பயிற்சி செய்யும் கர்லாகட்டையை இவருக்கு பரிசாக கொடுத்தாராம். இதை சத்யராஜே ஒரு தொலைக்காட்சி நேர்காணலின்போது சொன்ன ஞாபகம்.

காலத்துக்கு ஏற்றமாதிரி தன்னை மாற்றிக்கொள்வதிலும் சத்யராஜ் முன்னோடியாகவே இருக்கிறார். ஒரு நிலைக்கு பிறகு அப்பா பாத்திரங்களில் நடிக்க ஆரம்பித்தார். இன்றும் இவர் சிறந்த குணசித்திர நடிகராக வலம் வருகிறார். இமேஜ் என்ற வட்டத்தில் இவர் எப்போதும் சிக்கிகொண்டதில்லை. அதற்க்கு உதாரணம் கதாநாயகனாக நடித்த பின்பு பாரதிராஜா படத்தில் ராஜாவுக்கு அப்பாவாக "வேதம் புதிது " படத்தில் நடித்து மாற்றத்தை உண்டாக்கியவர். தங்கர்பச்சானின் "ஒன்பது ருபாய் நோட்டு படம் இவர் நடிப்பில் ஒரு சிகரம். அது மட்டுமின்றி இவரின் கனவு படமான "பெரியார்" படத்தில் தன் சொந்த குரலில் பேசி நடித்து அதையும் நிறைவேற்றிக்கொண்டார் நம்ம புரட்சித்தமிழன்.

இன்றும் தமிழ் சினிமாவில் தவிர்க்கமுடியாத பாத்திரங்களில் நடித்து மக்கள் மனதில் இடமம் பெற்று இருக்கும் நம்ம சத்யராஜின் ஒரே மகன் சிபிராஜ் தமிழ் சினிமாவில் சோபிக்க முடியாமல் போனது வருத்தமே.

முதன் முதலாக 2002 -ம் வருடம் "ஸ்டுடென்ட் நம்பர் 1" படத்தின் மூலமாக கதாநாயகனாக அறிமுகமானார். அந்த படம் சொல்லிகொள்ளும்படி இல்லை என்றாலும், இவரை நிலை நிறுத்த சத்யராஜ் அவர்களுடன் இணைந்து "ஜோர்" "வெற்றிவேல் சக்திவேல்" கோவை பிரதர்ஸ்" போன்ற படங்களில் நடித்தார்.

பின்பு "பிரபு சாலமன்" அவர்களின் இயக்கத்தில் "லீ " என்ற படத்தில் நடித்தார். இந்த படத்தை சத்யராஜே தன் மகனுக்காக தயாரித்தார். மற்ற படங்களை காட்டிலும் இந்த படம் ஓரளவிற்கு நல்ல நடிகர் என்ற பெயரை பெற்று தந்தது.  ஆனாலும் தமிழ் சினிமாவில் தனக்கென்று நிரந்தரமாக இவரால் ஒரு இடத்தை தக்கவைத்துக்கொள்ள முடியவில்லை.
கடைசியாக தன் தந்தையின் பாணியை பின்பற்றி வில்லனாக நாணயம் படத்தில் நடித்தார். இன்றுவரை அதுவே அவரின் கடைசி படமாக உள்ளது. பொறுத்திருந்து  பார்ப்போம் இன்னும் வயசிருக்கு. நாற்பது வயதில் பெரிய நட்சத்திரமாக மின்னிகிற விக்ரம் போல இவருக்கும் வாய்ப்பு இருக்கிறது.

இதன் தொடர் பதிவுகளை படிக்க, கீழ்க்கண்ட சுட்டிகளை அழுத்தவும்.

தமிழ் சினிமாவில் சோபிக்காத வாரிசுகள்-மனோஜ் பாரதிராஜா 
தமிழ் சினிமாவில் சோபிக்காத வாரிசுகள்- கார்த்திக் ராஜா
தமிழ் சினிமாவில் சோபிக்காத வாரிசுகள்-S.P.B. சரண்

அன்புடன் 

அசோக் குமார்